Яңылыҡтар
Башҡортостанда вакансиялар һаны артҡан
Башҡортостанда мәшғүллек хеҙмәтендә эш биреүселәр тәҡдим иткән вакансияларҙың иҫәбе артҡан. Мәҫәлән: йыл башында республиканың вакансиялар банкында 32,3 меңдән ашыу эш урыны иҫәпләнһә, бөгөн – 35,3 меңдән күберәк.
Рәсми теркәлгән эшһеҙҙәр һаны төбәктә уҙған аҙнала бер аҙға кәмеп, 24,2 мең кеше тәшкил итте. Теркәлгән эшһеҙлек кимәле республикала 1,2 процентҡа тиң.
«Башинформ» агентлығы хәбәр иткәнсә, Башҡортостанда Халыҡ-ара хеҙмәтте ойоштороу методикаһы буйынса дөйөм эшһеҙҙәр һаны 115 мең кешенән арта. Бер йыл элек республикала 122 меңдән ашыу эшһеҙ иҫәпләнгән.
Был Федераль дәүләт статистикаһы хеҙмәте уҙғарған 2016 йылдың ноябре – 2017 йылдың ғинуары өсөн һуңғы уртаса эш көсөн тикшереү һөҙөмтәләре.
Башҡортостандың мәшғүл халыҡ иҫәбе әлегә 1,892 миллион кешенән күберәк.
/«Башинформ» мәғлүмәт агентлығы, Галина Бахшиева/.