Яңылыҡтар

11.10.10

Ауыл хужалығы йәрминкәһе

Үткән шәмбе быйыл икенсе тапҡыр ҡаланың үҙәк майҙанында ауыл хужалығы йәрминкәһе үтте. Йәрминкәгә килгән халыҡтың һаны, бындай йәрминкәләр үткәреүҙең кәрәклеге хаҡында әйтеп тора.

Майҙан ауыл хужалығы продукциялары тейәп килгән машиналар менән тулы ине. Йәрминкәгә тауарҙарҙы Нефтекама етештереүселәре генә түгел, күрше Ҡалтасы, Краснокама, Яңауыл, Борай райондары аграрийҙары ла килтергән. Рәттәр буйлап ит, балыҡ, йәшелсә-емеш, бал һәм үҫентеләр теҙелгән, ҡаланың һөт һәм икмәк комбинаттары, шулай уҡ шәхси эшҡыуарҙар үҙ продукцияһын халыҡҡа тәҡдим итте. Аҙыҡ-түлектең хаҡы баҙар хаҡынан арзаныраҡ булыуы оҙон сираттар барлыҡҡа килеүгә сәбәпсе булды. Һуғандың килоһын, мәҫәлән 17 һумға, картуфты 21, кәбеҫтәне 18-20 һумға һатып алырға була ине.

Йәй ҡоро һәм эҫе килеүенә ҡарамаҫтан умартасылар быйыл мул уңыш алған. Балдың күңелен теләгәнен һайлап алырға була ине, өс литрлы банканың хаҡы 1300 һумдан алып 1500 һумға ҡәҙәр ине. Крәҫтиән-фермер хужалығы етәксеһе Айҙар Имамов умартасылар йәрминкәгә күп килгән, шулай ҙа бындай конкурентлыҡ уға үҙ балын һатырға ҡамасауламаҫ, тип уйлай.

Ҡала хәкимәтенең сауҙа һәм эшҡыуарлыҡ бүлеге хеҙмәткәрҙәре хәбәр итеүенсә был йәрминкәлә бөтәһе 32 тонна продукция һатылған. Йәрминкәгә бара алмағандарҙы алда алда тағы ла 2 йәрминкә көтә, улар 16-сы һәм 23-сө октябрҙә үтәсәк.